|| śrī gaṇeśāya namaḥ ||
|| śrī umāmaheśvarābhyāṃ namaḥ ||
|| śrī gurave namaḥ ||
|| śrī bhairavāya namaḥ ||
śrī devyuvāca |
bhagavan sarvavettā tvaṃ devānāṃ prītidāyakam |
bhairavaṃ kavacaṃ brūhi yadi cāsti kṛpā mayi || 1 ||
prāṇatyāgaṃ kariṣyāmi yadi no kathayiṣyasi |
satyaṃ satyaṃ punaḥ satyaṃ satyameva na saṃśayaḥ || 2 ||
itthaṃ devyā vacaḥ śrutvā prahasyātiśayaṃ prabhuḥ |
uvāca vacanaṃ tatra devadevo maheśvaraḥ || 3 ||
īśvara uvāca |
bāṭukaṃ kavacaṃ divyaṃ śṛṇu matprāṇavallabhe |
caṇḍikātantrasarvasvaṃ baṭukasya viśeṣataḥ || 4 ||
tatra mantrādyakṣaraṃ tu vāsudevasvarūpakam |
śaṅkhavarṇadvayo brahmā baṭukaścandraśekharaḥ || 5 ||
āpaduddhāraṇo devo bhairavaḥ parikīrtitaḥ |
pravakṣyāmi samāsena caturvargaprasiddhaye || 6 ||
praṇavaḥ kāmadaṃ vidyā lajjābījaṃ ca siddhidam |
baṭukāyeti vijñeyaṃ mahāpātakanāśanam || 7 ||
āpaduddhāraṇāyeti tvāpaduddhāraṇaṃ nṛṇām |
kurudvayaṃ maheśāni mohane parikīrtitam || 8 ||
baṭukāya maheśāni stambhane parikīrtitam |
lajjābījaṃ tathā vidyānmuktidaṃ parikīrtitam || 9 ||
dvāviṃśatyakṣaro mantraḥ krameṇa jagadīśvari |
|| oṃ hrīṃ baṭukāya āpaduddhāraṇāya kuru kuru baṭukāya hrīṃ ||
( please chant the above mantra 11 or 21 times )
oṃ asya śrī baṭukabhairavabrahmakavacasya bhairava ṛṣiḥ |
anuṣṭup chandaḥ | śrī baṭukabhairavo devatā |
mama śrībaṭukabhairavaprasādasiddhyarthe jape viniyogaḥ ||
atha pāṭhaḥ |
oṃ pātu nityaṃ śirasi pātu hrīṃ kaṇṭhadeśake || 10 ||
baṭukāya pātu nābhau cāpaduddhāraṇāya ca ||
kurudvayaṃ liṅgamūle tvādhāre baṭukāya ca || 11 ||
sarvadā pātu hrīṃ bījaṃ bāhvoryugalameva ca ||
ṣaḍaṅga sahito devo nityaṃ rakṣatu bhairavaḥ || 12 ||
oṃ hrīṃ baṭukāya satataṃ sarvāṅgaṃ mama sarvadā ||
oṃ hrīṃ pādau mahākālaḥ pātu vīrāsano hṛdi || 13 ||
oṃ hrīṃ kālaḥ śiraḥ pātu kaṇṭhadeśe tu bhairavaḥ |
gaṇarāṭ pātu jihvāyāmaṣṭābhiḥ śaktibhiḥ saha || 14 ||
oṃ hrīṃ daṇḍapāṇirguhyamūle bhairavī sahitastathā |
oṃ hrīṃ viśvanāthaḥ sadā pātu sarvāṅgaṃ mama sarvadaḥ || 15 ||
oṃ hrīṃ annapūrṇā sadā pātu cāṃsau rakṣatu caṇḍikā |
āsitāṅgaḥ śiraḥ pātu lalāṭaṃ rurubhairavaḥ || 16 ||
caṇḍabhairavaḥ pātu vaktraṃ kaṇṭhaṃ śrī krodhabhairavaḥ |
unmattabhairavaḥ pātu hṛdayaṃ mama sarvadā || 17 ||
nābhideśe kapālī ca liṅge bhīṣaṇabhairavaḥ |
saṃhārabhairavaḥ pātu mūlādhāraṃ ca sarvadā || 18 ||
bāhuyugmaṃ sadā pātu bhairavo mama kevalam |
haṃsabījaṃ pātu hṛdi so'haṃ rakṣatu pādayoḥ || 19 ||
prāṇāpānau samānaṃ ca udānaṃ vyānameva ca |
rakṣatu dvāramūle ca daśa dikṣu samantataḥ || 20 ||
praṇavaṃ pātu sarvāṅgaṃ lajjābījaṃ mahābhaye |
iti śrī brahma kavacaṃ bhairavasya prakīrtitam || 21 ||
caturvargapradaṃ nityaṃ svayaṃ devaprakāśitam |
yaḥ paṭhecchṛṇuyānnityaṃ dhārayet kavacottamam || 22 ||
sadānandamayo bhūtvā labhate paramaṃ padam |
yaḥ idaṃ kavacaṃ devi cintayenmanmukhoditam || 23 ||
koṭijanmārjitaṃ pāpaṃ tasya naśyati tatkṣaṇāt |
jalamadhye'gnimadhye vā durgrahe śatrusaṅkaṭe || 24 ||
kavacasmaraṇāddevi sarvatra vijayī bhavet |
bhaktiyuktena manasā kavacaṃ pūjayedyadi || 25 ||
kāmatulyastu nārīṇāṃ ripūṇāṃ ca yamopamaḥ |
tasya pādāmbujadvandaṃ rājñāṃ mukuṭabhūṣaṇam || 26 ||
tasya bhūtiṃ vilokyaiva kubero'pi tiraskṛtaḥ |
yasya vijñānamātreṇa mantrasiddhirna saṃśayaḥ || 27 ||
idaṃ kavacamajñātvā yo japedbaṭukaṃ naraḥ |
na cāpnoti phalaṃ tasya paraṃ narakamāpnuyāt || 28 ||
manvantaratrayaṃ sthitvā tiryagyoniṣu jāyate |
iha loke mahārogī dāridryeṇātipīḍitaḥ || 29 ||
śatrūṇāṃ vaśago bhūtvā karapātrī bhavejjaḍaḥ |
deyaṃ putrāya śiṣyāya śāntāya priyavādine || 30 ||
kārpaṇya rahitāyālaṃ baṭukabhaktiratāya ca |
yo'parāge pradātā vai tasya syādati satvaram || 31 ||
āyurvidyā yaśo dharmaṃ balaṃ caiva na saṃśayaḥ |
iti te kathitaṃ devi gopanīyaṃ svayonivat || 32 ||
|| iti śrī rudrayāmaloktaṃ śrī baṭuka bhairava brahma kavacaṃ sampūrṇam ||